Il svilup da la societad pretenda tschertas refurmas, quai è segir, ed effectivamain il sistem actual dischavantagiescha las pèras maridadas en cumparegliaziun cun las pèras betg maridadas. Ma jau apprezesch la contribuziun da "Mega Mind", er sche quella para a l'entschatta in zichel cumplitgada.

En effect, la taglia individuala na para betg dad esser in sistem perfetgamain gist. Surtut perquai ch'ina pèra n'ha betg ils medems custs sco duas persunas singulas: igl è fitg logic da considerar ch'ina pèra "gudogna" considerablamain dapli che duas persunas singulas, perquai che, per exempel, ella sto pajar mo ina tschains (u interess ipotecars, etc.), po cumprar dapli "en gross" (e damai proporziunalmain pli bunmartgà), po forsa sa cuntentar cun mo in auto, etc.

D'autra vart, perquai che la refurma sco ch'ella è planisada dischavantagiescha pèras, en las qualas, per tscherna u betg, in genitur lavura e l'auter bler main / betg. Senza entrar en ina debatta davart ils geners, bleras famiglias fan l'experientscha che sche in dals geniturs reducescha considerablamain sia quota da lavur per sa deditgar als uffants, quai contribuescha positivamain a l'equiliber da la famiglia ed a la qualitad da vita dals uffants.

Il PLD, en spezial, para da sa far gronds quitads davart la creschientscha economica dal pajais, ma i na duess betg impedair la voluntad da tschertas famiglias da privilegiar ina visiun cumplementara da las rollas entaifer la chasada.

Igl è interessant da leger che quels che èn cunter la taglia individuala, èn quai per motivs principalmain egocentrics. Al medem mument vegni rinfatschà a quels che èn a favur da la taglia individuala ch'els calculeschian e perquai na sa marideschia betg.

La lètg è in contract giuridic che duai garantir la segirezza vicendaivla e quella dals uffants. Che ins vegnia chastià per quai è cunter mintga giustia.

Quai che noss politichers na reusseschan betg è da crear in contract che saja gist per tuts. Quai na funcziuna betg mo per motivs ideologics, saja quai perquai ch'ins vul tegnair ferm a "tradiziuns" ad ogni pretsch u perquai ch'ins vul abolir gist questas ad ogni pretsch.

Sche ins mettess da vart questas ideologias, chattass ins fitg spert ina buna soluziun per tuts.