Refurmas en tge direcziun?

La baselgia catolica e sias doctrinas para per intgins forsa betg pli contemporanas pervia dal midament social e da las novas normas. E tuttina datti in grond dumber da persunas che vulan viver vinavant tenor las veglias doctrinas. Quai è en urden e po er restar uschia.

Tgi che construescha ina chasa, la construescha tenor ses giavischs, sias ideas e ses basegns e betg tenor las preferenzas dals vischins.

I dat quels che chattan quai bun e quels che criticheschan.

Sche la baselgia vul far adattaziuns, alura entra ella da sez en il dialog. Qua na dovri nagina societad che prescriva ad ina baselgia catolica tge che è actual e tge betg - tge ch'ella duai crair e refurmar e tge betg.

Sco ateist consider jau tuttina che tut las religiuns han ina responsabladad morala per garantir che la situaziun dal mund na sa pegiurescha betg, ed anc meglier, ch'ella sa meglierescha. En auters pleds, garantir che main persunas suffrian, surtut cun reducir la paupradad, u preservar la chasa cuminaivla ch'è noss planet, èn incumbensas che, indirectamain, concernan era la Baselgia catolica. Propi, quella ha ina pussanza d'influenza considerabla che fiss malonestaivel da betg utilisar sesplattond davos arguments teologics u da fideivladad a la doctrina.

Il papa, cun dapli ch'in milliard fidaivels e l'influenza ch'el po avair sin quels, ha senza dubi ina enorma responsabladad sin nivel mundial. El sto l'assumar. A mes avis ed a mia enconuschientscha è Francestg stà in dals sulets papas che ha chapì ed assumà cun curascha questa incumbensa tras sias posiziuns davart la preservaziun da la natira (vesair sia enciclica Laudato si'), davart la paupradad, davart ils migrants u davart il dialog interreligius.

I fiss natiralmain meraviglus sche la baselgia catolica cuntinuass ad avair in manader uschè illuminà, ma in tschert pessimissem ma di che la fracziun conservativa da la baselgia ha gia preparà in return anavos, era sch'i dovra dapli che mai dad ir enavant.