Sche nus contemplain il punct da vista actual e vesain cun tge engaschi, ambiziun e prestaziun che las dunnas han manà il ballape en il focus ils ultims onns, chat jau quai fitg turpegius e discriminant che quai na vegn anc adina betg tolerà 100% e che vegn per part anc adina ris davart quai. Las dunnas giogan in ballape frestg e na stattan insumma betg davos ils umens. Jau ma giavisch che quai continueschia uschia e che era la posiziun finanziala vegnia en il focus. Sche nus cumparegliain quant dapli ch'ils umens gudognan, quants milliuns che vegnan spendids per transferiments per lur prestaziuns che èn savens mo flattusas. Igl è temp da guardar en ils cudeschs e finalmain contemplar questa discrepanza cun egls averts e chattar soluziuns per la metter en il dretg focus. Jau giavisch al ballape da las dunnas da cor bler cletg, cuntinuai uschia.

Jau sun ina fan ed ina magistra da sport.

Jau sun indignada dal fracass mediatic che vegn fatg enturn il ballape da dunnas (sco era quel dals umens), entant che blers auters sports na vegnan betg sustegnids avunda dal stadi e dals meds da massa.

Quest reminent incredibel va ultra da quai a donn e cust d'auters sports feminins, sco basket, volleyball, atletica leugra euv., ma i vegn discurrì bler dapli dal ballape.

Questa anomalia è chaschunada d'in impuls politic bain chapaivel e legitim, central en nossa societad: la revalitaziun da la posiziun da la dunna, tant en il mund professiunal sco era tranter ils giuvens. Ma d'avair tschernì il ballape sco simbol per l'egualitad è per mai ina absurditad nuschaivla. Quest sport transmetta uschè blers messages ed attitudas negativas... na datti betg in meglier med da communicaziun?

Plinavant è il nivel savens deplorabel (cun excepziun da las meglras equipas) e las persunas che guardan lur emprim gieu sortan per il solit perplexas.