Tschertas interacziuns sur ils instruments digitals èn absolutamain instructivas e constructivas. Mintga tecnologia dovra l'educaziun e la prevenziun che va cun ella. Ma l'educaziun è ina decisiun politica, quai che, en ina democrazia, dovra savens bler temp. Avant 25 onns avevan ins gia en Svizra gruppas da discurs per persunas (creschidas, integradas, bain scoladas) che na pudevan betg sa distatgar da discussiuns online. Il svilup da las medias socialas e dals gieus da video en ils ultims dus decennis n'ha betg meglierà la situaziun. Ma i n'è betg la "digitalisaziun" che chaschuna problems, mabain il basegn d'immediatezza (impuls da cumprar, d'agir, da reagir, da survegnir renconuschientscha sociala tras likes), l'autosatisfacziun entras sa serrar en ina bulla d'infurmaziun e la surpli da stimuls dependents. Quai fa donn a la reflexiun. E la mancanza da reflexiun, davart sasez e davart ils auters, la negaziun da la nuantscha e da la cumplexitad, fa donn a la coesiun ed al cumpromiss.

Malgrà che la digitalisaziun ha aspects positivs, sto ella vegnir regulada e limitada. En il process da votaziun èn las discussiuns a quatter egls impurtantas per sa furmar in'opiniun. I dovra temp per laschar madirار in'opiniun, ins po esitar, discutar, cumparegliar ils differents arguments e sa sentir segir da sia decisiun. En la digitalisaziun mida il fatg d'esser a chasa, davant il computer u il smartphone, la situaziun. In auter punct: co esser coerents areguard il consum d'electricitad (dumonda creschenta, "cussegls" da las autoritads per limitar l'utilisaziun, reducziun e stgaudament da las auas) che nossa societad duess mantegnair ad in tschert nivel, sche il mund digital augmenta mo quest consum. Per betg menziunar ils centers da memorisaziun da datas che dovran fitg blera electricitad e blera aua per sa sfradentar. Tut quai è incoherent.