Anc in tema davart il qual jau pudess respunder gea e na! Concernent las preoccupaziuns dals giuvens areguard lur futur professiunal (intelligenza artifiziala), la midada dal clima e la reducziun da la biodiversitad en noss pajais... insumma l'impressiun ch'els han che noss politichers sa fistgian da quests temas, na poss jau che respunder gea! Ma da l'autra vart, lur mancanza d'engaschament en las votaziuns ed elecziuns sin tut ils nivels (en cumparegliaziun cun autras classas da vegliadetgna), malgrà ch'els han la fortuna da pudair far quai regularmain cuntrari a pli u main tut ils pajais dal mund, ma fa dir na! Sch'els vulan midadas, ch'els participeschian dapli a la vita democratica e main a las medias socialas, perquai che quellas na midaran betg lur vita! Ma lur vota, quella percunter pudess far quai!

Quai che ma disturba en la dumonda è il fatg ch'ella oppona las generaziuns. Segir, tschertas categorias da la populaziun han basegns spezials, ed ils giuvens han mintgatant main dretg d'avair pled en chapitel en cumparegliaziun cun ils creschids che han gia chattà lur plazza en la societad. Ma jau chat che ils giuvens han la pussaivladad da s'exprimer (parlament da giuvenils, giuventetgnas dals partids e.u.v.) e che en bleras citads e vitgs datti lieus ed activitads per els (chasas da giuvenils, "girons" en la champagna e.u.v.).

Plinavant na dastgain nus betg emblidar che l'adolescenza ed il cumenzament da la vegliadetgna d'adult è per regla in temp da dubis e malsegirtads, e quai è tuttafatg normal.

Là nua che jau chat ch'i pudess dar ina meglieraziun è en l'integraziun sin il martgà da lavur. Jau hai oz 31 onns, jau hai terminà mes studis amez il COVID e ma sun sentì cumplettamain sulet ed umilià, surtut perquai che jau n'aveva nagin dretg sin indemnisaziuns da dischoccupaziun...