Martgà da festivals sursaturà

Il dumber da festivals en Svizra franzosa saziescha la fiera

https://pilot-prod-videos.s3.eu-west-1.amazonaws.com/rm/outrageous-amber-chipmunk_fr_DEEPGRAM-WHISPER.vtt

Mintg'onn datti en Svizra franzosa puspè novs festivals da musica che cumpletteschan la purschida ch'è tuttavia gia fitg ritga. Per intgins dad els è l'avegnir pli e pli intschert, cunzunt en vista als onuraris d'artistas ed artists che creschan. Ed era las las subvenziuns che sa reduceschan han in effect.

Paucas emnas suenter l'annunzia da la segunda ediziun dal Vibiscum Festival che survegn schlantsch a Vevey è vegnì preschentà mardi in nov arranschament en la regiun da Losanna: Hyper Ouest. Questas duas occurrenzas ch'èn stgars 30 kilometers in ord l'auter reflecteschan in martgà adina pli chargià.

Dapi diesch onns cumparan regularmain novas purschidas. E questa stagiun vegn quai er ad esser il cas en il Giura cun il Festi'live a Porrentruy ed il terz Dritchino a Courgenay.

Futur cumplitgà per festivals pli pitschens

E questa fiera pudess vegnir anc pli chargiada en l'avegnir. «Igl è plitost probabel ch’i vegn a dar anc daplirs festivals, pertge che nus n’avain en Svizra franzosa anc betg gronds acturs internaziunals», ha declerà l’agent d'artists ed artistas Sébastien Vuiginier a La Matinale sin RTS.

A medem temp èsi pussaivel ch'intgins festivals svaneschan. Occurrenzas mesaunas (sut 10'000 persunas) ston cumbatter cun taxas adina pli autas. «Jau pens ch’i vegn ad esser grev ils proxims onns per ils festivals pli pitschens», ha ditg quest organisatur da concerts.

>> Intervista cun Sébastien Vuignier en La Matinale:

In onn da test per il public dal festival

Petzi, l'uniun tetgala svizra per lieus da musica e festivals non-profit, beneventa il boom actual, sa dumonda dentant co il public reagescha.

«Suenter dus onns pandemia vegnan las disas eventualmain a sa midar», ha ditg il coordinatur da la Svizra franzosa gievgia a La matinale. «Ussa essan nus puspè en ina sort normalitad, ma quest onn vegn in zic in onn da test per ils festivals», ha ditg Anja Della Croce. «Jau na ma fatsch betg quitads per ils aranschaments pli gronds, ma jau ma fatsch quitads per ils pitschens.»

>> Intervista cun Anya Della Croce en La Matinale:

E la dinamica da la purschida musicala che crescha onn per onn fa era squitsch sin ils gronds donaturs che reageschan correspundentamain. In nov festival en il chantun Vad che vuless per exempel vegnir sustegnì da la Loterie romande, sto spetgar enfin sia quarta ediziun per pudair profitar. Quai è dapi l'onn 2013 la regla en il chantun, ina midada ch'i ha dà suenter ina ferma carschen da dumondas per sustegn.

L'ultim temp han er il cahtun Vad, il Vallais e la citad da Genevra surlavurà lur politica da promoziun. Quai senza da reducir il sustegn Però cun promover pli paucs projects - vul dir aranschaments - a moda pli focusada.

En il temp suenter la pandemia datti pia ina tendenza da limitar il principi da repartiziun eguala per uschia sustegnair meglier ils acturs regiunals impurtants che vegnan probablamain a surviver. In'autra sfida per las chaschas dals festivals en Svizra è l'inflaziun dals onuraris d'artistas ed artists. Quai è il resultat d'ina ferma concurrenza naziunala ed internaziunala ch'è daventada anc pli ferma suenter la pandemia.

«Luzern Live» en temp da record

Nov festival «Luzern Live» fa il rocken en temp da record

Il nov festival è vegnì mess ad ir entaifer curt temp e sa concentrescha sin musica locala e persistenza.

https://pilot-prod-videos.s3.eu-west-1.amazonaws.com/rm/straight-mauve-zebra_de_DEEPGRAM-WHISPER.vtt

Igl è stà ina part integrala da la stad a Lucerna. Il fanadur è la riva dal lai a Luzerna sa midà en ina sort halla da concert. Il Blue Balls Festival ha attratg var 100'000 persunas. Gronds nums èn stads d'udir en il KKL: Ed Sheeran, Joss Stone, Iggy Pop u Rita Ora.

E lura èsi tuttenina vegnì quiet: per quatter onns. L'emprim è il Blue Balls vegnì annullà pervia da corona, lura pervia da la malsogna dal directur dal festival, Urs Leierer. La fin definitiva è vegnida il settember 2022.

Bunamain en il medem mument ha ina gruppa da musica da Lucerna cumenzà cun la lavur vi d'in concept per in nov festival, en il medem lieu, cun novas persunas. La finamira era ambiziusa: Gia la stad 2023 dueva il festival «Lucerne Live» avair lieu per l’emprima giada.

L'october 2022 ha la citad da Lucerna dà glisch verda. «Quai era cura che blers festivals avevan gia communitgà lur line-ups», sa regorda Piero Achermann, il president da l’uniun «Luzern Live».

Sustegn da la citad da Lucerna per «Lucern Live»

La citad da Lucerna sa legra ch'i dat il fanadur puspè in festival da musica. Quai è impurtant per la politica culturala e per il turissem. La citad metta a disposiziun il terren public. Era ina rolla gioga il dretg d'utilisaziun per il KKL che prevesa cundiziuns pli favuraivlas per ils organisaturs. La contribuziun finanziala da la citad per il festival munta a 60'000 francs. Quai è stgars la mesadad da quai ch'ils Blue Balls han survegnì. «Quai ha da far cun il fatg ch'il festival «Luzern Live» n'ha betg la grondezza dal Blue Balls», ha il president da la citad Beat Züsli argumentà.

Co stgafeschan ins uschè in grond festival en uschè curt temp? «Cun bler cor ed olma», di Piero Achermann. E cun bunas colliaziuns. Per il program da musica è vegnida dumandada l'agentura da cudeschaziun lucernaisa «Orange Peel» che ha gì in mez onn temp da engaschar bands, musicists e songwriters.

Tar ils gronds acts internaziunals avain nus propi gì pauc temp.

Quai è stà ina sfida, di Mike Walker dad Orange Peel. Ins stoppia dentant distinguer tranter artistas ed artists naziunals ed internaziunals: «Sch’ins s’interessescha per bands u newcomers sin plaun naziunal, n’èn ils temps da preparaziun betg uschè lungs. Tar ils gronds acts internaziunals percunter avain nus propi gì pauc temp.» Els han gì basegn d'agid: agenturas partenarias u glieud che han cudeschà las bands.

Malgrà tut è vegnì mess ensemen in program respectabel. Al«Luzern Live» èn sa preschentads var 60 acts da musica sin differentas tribunas a la riva dal Laid: en il KKL per exempel l’enconuschenta band britannica «The Kooks».

Gia vendids ora èn stads ils concerts da «Hermanos Gutiérrez» e «Black Sea Dahu». Tut en tut datti dentant bler pli paucs concerts en il KKL che durant il Blue Balls.

Sin in grond palc davant il KKL metta il festival sapientivamain in accent sin la musica svizra. I saja impurtant da sa fidar dals indigens, din ils organisaturs. Betg mo quai che pertutga la musica.

E cun quai essan nus tar il tema persistenza. Era sch’i n’è betg simpel, di Mirco Meyer, manader da construcziun tar il «Luzern Live»: «Sch’ins vul far in festival persistent, na dastgan ins en sasez betg far in festival, quai savain nus.» Ma sin intgins puncts pon ins far attenziun.

Sch'ins vul organisar in festival persistent, na dastgan ins en sasez betg far in festival, quai savain nus.

Responsabla per la tecnica è ina interpresa da la citad vischina Emmen. Per la zona da magliar per lung da la promenada dal lai, ch'era gia ina part impurtanta dal festival Blue Balls, è vegnida prendida en mira ina cooperaziun regiunala, tant cun ils furniturs sco er cun la gastronomia.

«Uschia spargnain nus viadis. E quai è persistent», di Mirco Meyer.

Ins s’accorscha ch’ils responsabels èn bain enragischads en la regiun. Il colorit local sa manifestescha era als stans da mangiar: Las tegias da lain èn tuttas picturadas en las colurs lucernaisas blau ed alv. Las tegias duain vegnir messas si mintg'onn.

Nagina crisa tar pretschs da bigliets

Ils pretschs per bigliets da concert ed ils onuraris d'artists n'han nagina crisa

Il tema occupa l'industria da musica dapi il collaps da las venditas da discs avant var ventg onns. L'augment cuntinuant dals pretschs per ils onuraris d'artistas e d'artists e l'augment dals pretschs da bigliets che resulta da quai fan quitads a la branscha. La pandemia ha da novamain chaschunà in augment rasant. Ina survista.

Dapi la fin da la pandemia da Covid che ha frenà il mund e la cultura, alarmescha, gea smanatscha, in nov augment da gaschas dals gronds headliners in entir ecosistem.

Explosiun da gaschas per ils headliners da lingua englaisa

Uss tschontschan ins da cifras astronomicas per tscherts stars da lingua englaisa che na faschessn naginas preschentaziuns per main che 700'000 fin 750'000 francs, entant ch'auters artists internaziunals cumenzan tar 300'000 fin 400'000 francs.

Ed era il cunfin dad 1 milliun francs vegn rut tras d'intgins superstars giuvens, sco per exempel Billie Eilish. Er ils pretschs per headliners da lingua franzosa èn ids a munt e sa chattan savens tranter 150'000 e 200'000 francs. Pli baud era quai anc enturn 80'000 francs.

Natiralmain che tut ils festivals e tut ils organisaturs da concerts en ils Stadis Unids ed en l'Europa deploreschan quests augments che sveglian temas. Les Vieilles Charrues, il festival il pli grond da la Frantscha a Carhaix en la Bretagne, ina spezia da paléo, ma cun 70'000 visitaders per saira (dubel uschè blers sco a Nyon).

Il directur dal festival, Jérome Trehorel, aveva sperà che quels augements repetids tar las gaschas svaneschian suenter la curta pausa post-Covid il 2021, «durant la quala artists han fatg sforzs finanzials per puspè vegnir sin il palc. Quai chaschuna displaschaivlamain anc pli grondas discrepanzas tranter festivals mesauns che na pon betg pli cuntanscher tscherts artists. Ed er per ils festivals ils pli gronds na pon betg pli ristgar da programmar tscherts artists, perquai ch'els n'han betg la garantia da vender il dumber da bigliets necessari per per gulivar lur cudeschs. Quai dependent da lur model da fatschenta u la structura giuridica.

Il martgà live pudess valair 38 milliardas dollars americans fin l'onn 2030

Ils ultims onns ha il martgà da concerts segiramain survegnì in'impurtanza economica. Tenor indicaziuns da la banca d'investment Goldman Sachs vegnia il martgà live a valair il 2023 bunamain 30 milliardas dollars (29.1). Enfin il 2030 pudess el dentant crescher sin passa 38 milliardas. Per ina band da turas portan concerts tranter 33% e 75% da lur entradas.

L'ambient d'inflaziun actual è particular, perquai ch'el vegn era a chaschunar in augment considerabel dals custs tar tut las persunas che prestan servetschs. Vul dir: transports (locaziun da autocars, chars annexs), alloschi, segirezza, equipament tecnic, tun e glisch ed ils apparats da video che vegnan nizzegiads dals artists. Quests custs èn sa dublads u schizunt sa triplads tar tscherts posts.

Tar Opus One, in dals dus pli gronds producents da concerts e show en la Svizra franzosa, conceda il directur Vincent Sager la gronda influenza da las gaschas e dals custs da producziun sin ils pretschs dals bigliets: «Nus avain stuì prender en vista augments da pretschs necessaris per equilibrar ils augments da custs e gaschas che zuppan dal reminent savens ils augments da custs. Tut tenor project artistic avain nus augmentà ils pretschs per 10 fin 20%.

Adattaziun dals budgets artistics da tscherts festivals

En vista a quests augments han intgins festivals stuì far sacrifizis artistics u augmentar lur budget da la programaziun. Quai vala en spezial per il Paléo Festival. Per betg augmentar quest onn ils pretschs dals bigliets e per porscher la medema purschida da concerts sco fin uss, declera il manader da program Jacques Monnier ch'il Paléo haja empermess d'augmentar ses budget artistic per var 12.5% sin 4.5 milliuns francs (var in sisavel dal budget total). La preschentaziun da – tranter auters – la chantadura spagnola celebrada Rosalía è senza dubi in factur.

Les Vieilles Charrues han la medema politica da pretsch e na vulan betg auzar ils pretschs dals bigliets, malgrà ch'els porschan quest onn ina saira supplementara cun in concert da Red Hot Chili Peppers ch'è lura in pau pli char ed intgins headliners da renum (Blur, Robbie Williams e Rosalía) quai ch'ha motivà els d'augmentar lur budget artistic excepziunalmain sin 6 milliuns euros, cumpareglià cun ils 4.5 fin 5 milliuns sco normal.

Tar il Montreux Jazz Festival percunter n'è il budget artistic betg vegnì augmentà quest onn. Il directur Mathieu Jaton conceda dentant ch'ils custs d'hotel e d'alloschi sajan creschids per radund 200'000 francs. Quai per part perquai ch'er artists vulan restar per plirs dis sper il Lac Léman. Entant che l'augment da las gaschas è er stà da sentir là, ha Mathieu Jaton accentuà cunzunt ils custs da producziun che s'augmentan. El inditgescha er in lev augment dals pretschs da questa stad da var 3% tar ils pretschs d'entrada ch'èn per saira tranter 88 e 455 francs per in concert exclusiv svizzer da Bob Dylan cun ina capacitad reducida da 1500 plazzas en l'Auditorium Stravinski.

In ulteriur aspect da l'augment da las gaschas è il fatg ch'intgins agents nizzegian la concurrenza pli dira tranter ils festivals e laschian uschia ir a munt las gaschas en Europa. Intgins artists haian schizunt dublegià lur onuraris, uschia Jacques Monnier dal Paléo Festival.

Sébastien Vuignier, directur da Takk Production, in’agentura da cudeschaziun e da promoziun en Svizra che porta en Svizra gruppas sco Muse, Amy Macdonald, Radiohead, Nick Cave ed Arctic Monkeys, sco er blers newcomers da lingua englaisa, vesa en quest reguard ina spirala generala vers ensi tant tar las gaschas sco era tar ils pretschs dals bigliets. «Il squitsch da custs crescha. Quai pertutga er ils custs da las turas. Perquai èn ellas sut squitsch d'augmentar lur entradas. Quai ans sforza d'auzar ils pretschs dals bigliets, perquai che nus stuain esser buns da budgetar a moda coherenta e cuvierer tant ils custs creschents sco er noss custs al lieu. Ma la fin dals quints paja l'aspectatur il quint. En noss cas faschain nus marschas tar ils concerts gronds che pon pajar nossas investiziuns en il svilup d'artists.

Opus One mussa oravant tut cun il det sin ina ristga a curta fin media vista d'ina surstgaudada en l'ambient d'inflaziun actual, quai che na fiss bun per nagin. Quai manegia almain Vincent Sager: «Nus sentin propi ina surstgaudada quai che pertutga ils plans da tunea dals artists. Las dumondas per reservar e metter a disposiziun lieus d'occurrenza per l'onn 2024 èn fenomenalas, pli fermas che mai. I vegn ad esser anc dapli artists en gir che l'onn 2023. Nus e noss collegas stuain avair quità che nus na vulain betg far tut e na crudain betg en in entusiassem memia grond. Nus ristgain da la fin avair ina purschida da concerts ch'il public n'è betg abel da recepir.

Tenor Jérome Trehorel dal festival Les Vieilles Charrues ha questa surstgaudada era manà ad in augment malsaun dals pretschs dals bigliets. «Las gaschas duessan sa drizzar tenor l'abilitad d'in artist da vender bigliets sin in festival u en in tschert territori. Deplorablamain na funcziuna quai betg, e nus stuain ans cunfruntar cun pretensiuns finanzialas ch'èn dal tuttafatg distatgadas da la realitad. Ils concerts èn daventads oz in product da luxus.

Memia blers festivals?

Festivals vegnan adina pli chars

Bigliets pli chars, biera pli chara: stad da festivals custa dapli

Festivals da musica teman ch'il public na veglia betg pajar ils pretschs da bigliets pli auts u ch'el spargnia tar il consum a l'open air.

https://pilot-prod-videos.s3.eu-west-1.amazonaws.com/rm/kind-puce-koi_de_SPEECHMATICS.vtt

Vegn la glieud cun dosas da biera bunmartgada ord il supermartgà al concert u baiva el la biera pli chara a la bar? Quai sa dumonda Elena Conradt, l'administratura dal «Jugendkultur Festival Basel», avant la stad da festivals.

lla è ina da bleras organisaturas che sa fa gronds quitads. Gist per in festival gratuit che sa drizza a glieud giuvna, saja la situaziun questa stad «fitg difficila».

La raschun è l'inflaziun e la pandemia da corona. Betg mo blera rauba sco biera vegn pli chara mabain era ils servetschs: «Bajegiar si la da tribuna custa quest onn radund 30% dapli», di Jeroen van Vulpen, il president dal festival da Basilea «B-Scena».

Pli char da bajegiar si saja quai stà pervia da la pandemia che haja tutgà spezialmain ferm la branscha d'events, ha van Vulpen agiuntà. Bleras interpresas han stuì serrar, uschia che la construcziun dals festivals n'è betg stada uschè simpla questa stad sco ils onns precedents. «Ma tribunas èn relevantas per il festival, nus na vegnin betg or senza ellas.» Il festival «B-Scena» sto perquai «far adattaziuns» en auters lieus.

Questas «Adattaziuns» na pudessan dentant betg egualisar ils custs supplementars, di Elena Conradt che ponderescha era da spargnar. «Jau poss spargnar en in lieu 200 francs ed en in auter 500 francs. Ma uschia na poss jau betg emplenir la gronda fora en la cassa.»

Ils pretschs dals bigliets èn creschids per diesch pertschient

Auter sa preschenta la situaziun a Son Gagl, in dals gronds open airs cun mintgamai varga 100'000 visitadras e visitaders. Malgrà ch'ils pretschs per bigliets per il festival che ha lieu la fin zercladur custan 10 pertschient dapli che l'onn passà, èn tuts bainprest vendids ora, di il directur dal festival Christof Huber. Nus construin er las duas etappas ch'èn vegnidas agiuntadas l'onn passà.

Er ils Bernais sa mussan lucs – e quai «malgrà che noss custs èn creschids massivamain tant per material sco era per persunal», di Lena Fischer dal festival dal Gurten. La vendita da bigliets marscha bain, malgrà pretschs pli auts.

Zermatt reducescha festival per in lieu d'occurrenza

Il festival «Zermatt unplugged» ha gia gì lieu quest onn. La finamira da l'ediziun 2023 è stada d'attrair uschè blers visitaders sco avant la pandemia. Las aspectativas ch’èn stadas pli che accumplidas, malgrà ch’ils pretschs per bigliets èn s’augmentads: «Il dumber da las venditas da bigliets ed ils retgavs ch’èn colliads cun quai èn stads sur il nivel d’avant la pandemia, quai che ha fatg daventar nus fitg ventiraivels», uschia il mainagestiun Rolf Furrer.

Damai che las expensas eran dentant creschidas, han ins stuì spargnar, malgrà bunas venditas da bigliets: «I ha dà ina location da concerts pli pauc e nus avain desistì d’in u dus detagls – sco ils chalets en il Taste Village».

Furrer parta dal fatg che las expensas dals giasts èn creschidas era sper la vita da festival, tant pli che hotels e restaurants èn vegnids pli chars.

Malgrà il success a Zermatt datti per exempel a Basilea adina dapli vuschs che speran sin agid dal stadi – pli exact dal fond da Swisslos. Almain na croda quai betg sin ureglias surdas.

«Sch'insatgi po cumprovar a moda credibla ch'i dat problems, per exempel perquai che la construcziun da tribunas è vegnida pli chara, lura pudess quai esser pussaivel da reagir finanzialmain sin quai», di il pledader dal departament da Basilea-Citad ch'è responsabel per ils daners da Swisslos. En quest reguard n'è dentant anc vegnì decidì nagut.

Co funcziuna ina fulla?

La stad è il temp da las festas. Funcziunan fullas tenor reglas universalas u culturalas? Èn ellas privlusas u intelligentas? Respostas da l'expert Mehdi Moussaïd en l'emissiun Point J.

«Cun 6 u 7 persunas per meter quadrat entrain nus en il mund da la fisica. Nus vegnin a modellar currents da peduns cun utensils sco la mecanica da currents. A la fin na gioga l’intent da l’inscunter, il consum d’alcohol u la qualitad da l’arbiter tar in gieu da ballape nagina rolla pli, accentuescha il «fullolog».

En cas d'ina spessezza pli pitschna gioga la cultura dal pajais ina gronda rolla, per exempel areguard la distanza sociala u la moda e maniera co ch'ins passa auters peduns.

Tge chaschuna adina puspè panicas da massa e tragedias sco a Mecca e durant l'ultim Halloween a Seoul? «Questas tragedias èn savens il resultat d’ina cumbinaziun da facturs: Dad ina vart damemia glieud, daplirs che spetgà, stretgas e chaussas che fan fugir la fulla en ina tscherta direcziun.

Co vegnan ins da fugir d'ina fulla memia sepssa? Tge èsi cun fullas digitalas? Èn fullas bunas giugaduras da schah?

https://pilot-prod-videos.s3.eu-west-1.amazonaws.com/rm/ripe-sienna-jackal_fr_DEEPGRAM-WHISPER.vtt

Litteratura cuntinuanta: Fouloscopie, Mehdi Moussaïd, Humensiences e J'ai Lu. www.mehdimoussaid.com

Foules, in'exposiziun en la Cité des Sciences et de l'industrie fin ils 7 da schaner 2024, cun in gieu da fugia online.

Openair Chappella

Openair Chapella: Bella musica, cordialitad e fatschas rientas

Dapi l’onn 1981 vegn festivà mintg’onn l’Open Air Chapella. Cun quai è l’occurrenza tradiziunala il pli vegl openair dal Grischun ed era in dals pitschens. Il festival ha gì lieu per la 41avla giada en in cleragl en il guaud, nua ch’ins po giudair ils concerts era direct da la tenda. L’atmosfera a Chapella è patgifica, famigliara e survesaivla. Sper divers concerts che han lieu durant trais dis datti er in program vast per uffants. Igl è pia in openair per l’entira famiglia. L'openair engiadinais ha attratg quai onn var 300 persunas, sco ils organisaturs communitgeschan.

L’emprim di da l'openair da quest onn, il venderdi, è il focus stà sin la musica rumantscha. Numnadamain èn stadas la band DUS, Ladunna e Free Bottle sin la tribuna. La sonda e dumengia èn seguidas diversas bands svizras che han procurà per in'atmosfera festiva.

#Svizzerando ina gronda festa

#Svizzrando e la pli gronda festa da l'Europa

Tranter ils stans dal festival da musica da students Balélec a Losanna na dastga il stan tessinais betg mancar

https://pilot-prod-videos.s3.eu-west-1.amazonaws.com/rm/arrogant-apricot-parakeet_it_DEEPGRAM-WHISPER.vtt

In di l'onn avra il campus da l'universitad politecnica da Losanna ses portals per Balélec, il festival da musica da students il pli grond da l'Europa. In festival che beneventa 15 milli persunas daspi uss 40 onns. Sin il program stattan concerts e represchentaziuns da saut. E tranter ils stans dal festival na dastga en mintga cas betg mancar quel dals students tessinais ch'è il pli popular tar il visitaders dal Balélec, co che Thierry Fontana ans raquinta en questa sequenza da #Svizzerando.

Lozza total

Ils pli gronds cumbats da lozza sut tschiel avert en Svizra

Il festival Heavy Metal a Wacken (DE) è sfundrà actualmain en la glitta. Er en Svizra hai dà ils ultims onns adina puspè scenas da glitta sut tschiel avert. In sguard enavos en maletgs.

Tgi che vegn qua na sto betg avair tema dal contact cun la lozza: Open Air Son Gagl. Probablamain ina da las pli renumadas festas en la lozza en Svizra.

Tar il Greenfield Festival 2016 ha la trid'aura midà la plazza aviatica ad Interlaken en ina cuntrada da lozza.

Il Paléo Festival a Nyon è in dals pli gronds e bels festivals da la Svizra. Ma i n'è betg adina stà uschè bel.

Tar l'openair Frauenfeld hai adina puspè dà scenas da lozza. Quai è stà il cas er l'onn 2008.

Savens resta il Gurten festival schanegià da trid'aura. Ma l'onn 2000 hai dà là era scenas da lozza.

Voss feedback!

Festivals èn en moda. Adina daplirs ed adina meglier visità, savens pli chars e pli gronds. Ils festivals innoveschan era, ma per tge pretsch? 