Tge far cunter l'explosiun dals custs?
L'augment da las expensas per la sanadad fa quitads a blers Svizzers
Quai è era sa mussà en la debatta da «dialog» da l’emna passada cun la dumonda «È la ventira da la Svizra realitad u illusiun?». Il user da «dialog» Martin Zürcher ha per exempel scrit ch’i dettia en Svizra numerusas pussaivladads per optimar sia ventira e sias expensas individualas. Sco exempels ha el numnà tranter auter er la tscherna tranter la telemedischina u il model da medi da chasa e la tscherna da la franschisa. Auter vesa quai igl user Claus-Jürgen Hartmann. Per el è la ventira en Svizra in'illusiun sco ch'el explichescha. A la fin scriva el: «Davart il sistem da sanadad che regia qua na vi jau dir pli nagut. Ma jau n’hai anc mai scuntrà tants umans malsauns e limitads pervia da la sanadad sco qua en Svizra.» Quai al fetschia trist e na ventiraivel.
Augment rasant dals ultims onns
Influenzeschan ils custs da sanadad auts pia la ventira en Svizra? Sin la pagina da SRF da la plattafurma social media Linkedin ha l'utilisadra Heidi Kübler, tgirunza diplomada SSS, commentà ch'era ella sa fatschentia ferm cun l'explosiun dals custs en il sistem da sanadad. Tenor ella èn ils controlladers e l'administraziun il vair problem. Quella fatschia adina dapli prescripziuns. A medem temp sa reducescha adina dapli la qualitad giavischada en la tgira.
Quests dis han las cassas da malsauns annunzià ch'ellas spetgian per l'onn proxim in «martè da premias» dad 8 fin 9 pertschient. Las premias actualas na cuvrissan betg pli las expensas per ils medicaments, per ils tractaments a l'ospital e per las visitas dal medi. In svilup ch'ins po observar dapi onns. Sco quai che l'uffizi federal da statistica scriva, custava il sectur da sanadad 2001 anc 523 francs il mais per abitant ed abitanta. L'onn 2011 eran quai gia 673 francs e l'onn 2021 827 francs per persuna e mais.
Tema impurtant per il cumbat electoral
Era tenor la gronda retschertga d'opiniuns che l'institut GFS Berna ha fatg sin incumbensa da la SRG, fan ils umans ils pli gronds quitads pervi dals custs da sanadad creschents. 84 pertschient da las passa 50'000 persunas dumandadas han inditgà che quel tema als occupeschia fitg u vaira ferm.
Ils custs da las cassas da malsauns èn daventads in tema principal dal cumbat electoral. Da las partidas èn sin maisa las propostas las pli differentas per soluziuns: da l’aboliziun da l’obligatori da la cassa da malsauns fin ad ina colliaziun cun las entradas disponiblas. Era l'anteriura cussegliera federala Ruth Dreifuss (PS), sut la quala era entrada en vigur l'onn 1994 la lescha federala davart l'assicuranza da malsauns, è sa maschadada en la debatta. Ella ha ditg a Le Matin Dimanche da RTS: «I na dat nagin pilot en l’aviun. U meglier ditg, i dat memia blers pilots che dirigian tuts en differentas direcziuns. Il resultat è cha l'aviun na sgola betg propi a grad ora. El na croda bain betg per terra, ma memia blers passagiers vegnan scurlattads fitg.»
Quai mussa ch'il «martè da premias» che smanatscha procura dapertut per pensiers. Ma la dretga medischina n'è anc betg chattada.
Custs en il sectur da sanadad: È il sistem rut? Discutai ussa sin «dialog»!
