Cumbat per parcs solars en las Alps

La construcziun da gronds parcs solars en las muntognas pudess esser ina buna pussaivladad da producir dapli electricitad durant l'enviern ed il medem mument d'accelerar la midada energetica. Ma las organisaziuns per la protecziun da la natira fan opposiziun frontala cunter tals projects.

La dumengia han 54% da Vallesanas e Vallesans refusà ina ordinaziun per accelerar las proceduras d'approvaziun per projects solars en las Alps. L'ordinaziun ch'è ida en vigur gia il favrer da quest onn vegn abolida cun vigur immediata. Ils projects solars alpins gia annunziads en il chantun pon vegnir realisads tenor ina procedura da standard.

Igl è da resguardar che la votaziun demussa ina gronda discrepanza tranter francofons (passa 61% na) e germanofons (32% na).

L'ordinaziun avess duì esser la basa per la realisaziun chantunala da la lescha federala d'energia ch'è vegnida midada urgentamain avant in onn. Cun il Solar Express duai la producziun d'electricitad vegnir augmentada svelt durant l'enviern per evitar stretgas.

https://pilot-prod-videos.s3.eu-west-1.amazonaws.com/rm/detailed-pink-junglefowl-1_fr_DEEPGRAM-WHISPER.vtt

Actualmain retira la Svizra 6% da sia forza electrica via fotovoltaica. Studis mussan che l'installaziun da moduls solars sin il tetg da las Alps svizras pudess producir almain 16 uras terawatt (TWh) electricitad per onn – bunamain la mesadad da l'energia solara che las autoritads vulan producir fin l'onn 2050. Questas cifras ston dentant vegnir consideradas cun precauziun, perquai ch'ellas sa basan sin projects, dals quals las circumstanzas n'èn betg adina exactas e sin ils retgavs ipotetics.

Plirs projects per «farmas solaras» da vischnancas e d'interpresas da provediment d'electricitad existan gia – otg mo en il Vallais. Intgins han gia survegnì il sustegn da la populaziun locala. Ma fin ussa èsi mo darar propi vegnì a la realisaziun da tals implants gronds, perquai ch'els vegnan franads u bloccads tras la resistenza da las protecturas e dals protecturs da la cuntrada. En il Vallais han organisaziuns nunguvernamentalas engaschadas ed ils verds – sustegnids da la PPS dal Vallais francofon – prendì il referendum cunter l'ordinaziun ch’è vegnda refusada la dumengia. Per els han las ovras solaras nauschas consequenzas per cuntrada e biodiversitad ed els deploreschan l’unfrenda da tschients hectaras d'alp.

Il problem è ch'igl è urgent. Suenter la deliberaziun da la lescha davart la protecziun dal clima ston il traffic, il stgaudament e l'industria esser electrifitgads fin l'onn 2050. Tenor indicaziuns da l'associaziun da las interpresas d'electricitad svizras (AES) pudess la distatgada da las ovras atomaras - a medem temp - chaschunar ina stgarsezza d'electricitad da fin a 37 TWh, quai che correspunda a la producziun d'electricitad idraulica svizra. Vul dir: L’effizienza d’energia sto vegnir meglierada, e la Svizra sto producir dapli energia, cunzunt durant l’enviern.

Protecturs da l'ambient che s'engaschan cunter da quels projects pretendan ch'els na sajan betg cunter in'offensiva da forza solara ch'els valiteschan dal rest sco «necessaria», ma che quella na dastgia betg vegnir fatga sin donn e cust dal territori alpin selvadi.

Protecturs da la natira vulan chi vegnia dà la preferenza a projects vid construcziuns gia existentas sco mirs da fermada, indrizs da protecziun cunter lavinas, lais da fermada, telefericas u infrastructuras da traffic. Lieus, dals quals els din, ch'els hajan «in potenzial enorm, che n'è per gronda part anc betg utilisà».

Co cuvrir il basegn d'electricitad?

Producziun d'electricitad empè da protecziun da la natira?

Co po la Svizra cuvrir en l'avegnir ses basegn d'electricitad e quanta surfatscha da natira sto vegnir sacrifitgada per quest intent? Pro e contra vid l'exempel dal lai da fermada Grimsel.

Il mir da fermada dal Grimsel en la Part Sura Bernaisa represchenta la debatta davart l'avegnir da l'energia sco strusch in auter lieu. El duai vegnir auzà per 23 meters ed uschia furnir anc dapli electricitad indigena durant l'enviern. Ma il project è dispitaivel – sco era auters projects gronds, cun ils quals la Svizra vul far la midada energetica. I sa tschenta la dumonda: Duain nus producir electricitad enstagl da proteger natira e cuntrada? Quai è stada ina da las dumondas da la presidenta da la Pro Natura e cussegliera naziunala socialdemocrata Ursula Schneider Schüttel e dal manader da las ovras electricas bernaisas BKW, Robert Itschner – sin il mir da fermada dal Grimsel.

https://pilot-prod-videos.s3.eu-west-1.amazonaws.com/rm/wet-baby-blue-albatross_de_DEEPGRAM-WHISPER.vtt

Dapi il «Gea» a la lescha per la protecziun dal clima èsi cler che la Svizra dovra enfin l'onn 2050 dapli electricitad, cunquai ch'il traffic, il stgaudament e l'industria ston vegnir electrifitgads. Cunquai che las ovras atomaras duain vegnir tschentadas giu il medem mument, pudessi dar ina mancanza d'electricitad d'enfin 37 TWh, quai tenor l'associaziun da las interpresas d'electricitad svizras (VSE). Quai è il quantum da l'entira producziun d'energia idraulica en Svizra dad oz.

https://pilot-prod-videos.s3.eu-west-1.amazonaws.com/rm/low-olive-chinchilla_de_DEEPGRAM-WHISPER.vtt

L'effizienza d'energia sto crescher e la Svizra sto producir dapli energia surtut l'enviern. La fotovoltaica furnescha il mument stgars quatter TWh electricitad, enfin il 2050 duai quest dumber crescher sin 34 TWh, quai tenor la Confederaziun. La forza idraulica dastgass augmentar la producziun dad actualmain 37 TWh sin 39 TWh.

Quai duai vegnir cuntanschì cun accelerar las proceduras per novs constructs. Robert Itschner ed Ursula Schneider Schüttel ein perina. Il president da Pro Natura punctuescha dentant che proceduras dal stadi da dretg sco ina buna examinaziun dal project stoppian esser garantidas: «Ina consideraziun dals interess sto vinavant esser pussaivla.»

https://pilot-prod-videos.s3.eu-west-1.amazonaws.com/rm/visible-amaranth-stork_de_DEEPGRAM-WHISPER.vtt

Vid l’exempel da la construcziun planisada dal mir da fermada Grimsel che n’è dentant anc betg concludida, dilucidescha il schef da la BKW, Robert Itschner, quant ditg ch’in process cuzzia oz: Da l’idea enfin a la partenza pudessi cuzzar tar il rempar dal Grimsel 28 onns.

La Pro Natura è s'engaschada ensemen cun autras organisaziuns fin a la Dretgira federala cunter l'auzament dal mir da fermada. L'organisaziun per la protecziun da la natira ha entant però fatg pasch cun quel. Era perquai che la construcziun dal mir da fermada dal Grimsel è in dals 15 projects da forza idraulica, sin ils quals la «maisa radunda» sut l’anteriura cussegliera federala Simonetta Sommaruga è sa cunvegnida la fin da l’onn 2021: «Nus n’essan betg ventiraivels cun la construcziun dal mir da fermada, ma nus n’essan betg pli encunter», di Schneider Schüttel.

Il schef da la BKW è optimistic, cunquai che las sfidas sajan tecnicamain schliablas.

https://pilot-prod-videos.s3.eu-west-1.amazonaws.com/rm/narrow-moccasin-scorpion_de_DEEPGRAM-WHISPER.vtt

E: «Nus dumagnain quai, sche nus essan svelts. Nus stuain dar gas e stgaffir en Svizra in spiert, en il qual nus faschain e na debattain betg en perpeten.»

Producir electricitad u proteger la natira?

Agrivoltaica crescha

Adina dapli producents e purs da legums nizzegian l'agrivoltaica

Collecturs solars sin surfatschas cultivadas: l'agrivoltaica ha in grond potenzial per la producziun d'electricitad. En il conturn da Lucerna han ins avant dacurt prendì en funcziun l'emprim implant pli grond da quest gener en Svizra.

Ils collecturs solars vegnan installads uschia ch'els laschan penetrar avunda glisch per las plantas. L'implant na producescha betg mo electricitad, mabain filtrescha era l'irradiaziun dal sulegl, per che las plantas na pateschan betg.

«Sch'i dat memia bler sulegl, patescha la planta. Qua avain nus chattà ina soluziun che facilitescha la lavur, che serva a la planta e che producescha electricitad persistenta. Tge vul ins dapli?», di in pur da Gelfingen (LU) en l'emissiun 19h30 da RTS. El ha installà tschients da tals moduls sur sias chaglias d'ampuaunas, e quai sin 2600 meters quadrats.

Questa tecnologia savess dar l'impuls decisiv a l'energia solara. L'interpresa vadaisa Insolight, fundada il 2015, l'ha sviluppà. «La midada sin il sectur da l'energia progredescha actualmain bler memia plaun. Questa tecnologia è ina nova soluziun ch'ins po nizzegiar a l'engronda. Nus discurrin qua d'implants che produceschan en megawatt. Quai ans para fitg interessant», declera Laurent Coulot, il directur dad Insolight.

In ulteriur avantatg tenor il directur: collecturs solars èn ina soluziun excellenta per la crisa d'energia. «Il giavisch principal dals purs da legums è d'avair buns utensils agriculs e da pudair cultivar las plantas. Sch'els han però ultra da quai la pussaivladad da producir atgna electricitad, è quai fitg interessant, gist durant la crisa d'energia.» Per el dat questa crisa l'impuls decisiv per tut ils implants solars e per las energias regenerablas.

https://pilot-prod-videos.s3.eu-west-1.amazonaws.com/rm/left-cerulean-dragon_fr_DEEPGRAM-WHISPER.vtt

En Svizra lubescha la lescha l'agrivoltaica per culturas che basegnan ina protecziun cunter il sulegl u cunter granella, sco p.ex. ampuaunas. Sche tut questas surfatschas fissan cuvertas cun collecturs solars, muntass la producziun d'electricitad tenor l'Uffizi federal d'energia tranter duas e trais uras terawatt. Quai correspunda a circa 3% dal consum svizzer.

Percunter èsi scumandà d'installar cellas solaras sin ers gronds, ina restricziun necessaria tenor l'avis da l'Uniun purila svizra. «Per cultivar tartuffels u graun dovri grondas maschinas, e questas plantas dovran sulegl. Implants solars restrenschessan la producziun da victualias. Quai avess per consequenza che nus stuessan importar damain electricitad, dentant dapli victualias», declera Martin Rufer, il directur da l’Uniun purila svizra.

Chattai ora nua che Vus stais

Electricitad ord glatschers che liuan

En il Vallais èn plirs projects per novs lais da fermada en lavur. In dad els è a Goms. Las uniuns per l'ambient al cumbattan.

https://pilot-prod-videos.s3.eu-west-1.amazonaws.com/rm/regional-ochre-guineafowl_de_DEEPGRAM-WHISPER.vtt

Il Vallais duai daventar ils proxims onns la «battaria da las Alps» ed uschia rinforzar il provediment d'electricitad l'enviern – uschia las autoritads. Quai necessitescha però novs lais da fermada u l'engrondiment da tals.

Correspundentamain èn planisads numerus projects per novs rempars. Tranter quels è era in project en il Goms che n'era fin ussa betg enconuschent a la publicitad.

Planisà in nov lai da fermada sur Fiesch

Il concern d'energia Groupe E vul eriger sut il glatscher da Fiesch in rempar da serra da radund 120 meters autezza e 300 meters lunghezza. Quest rempar duai rimnar las massas d'aua dal glatscher che liua adina pli spert e durant l'enviern far electricitad ordlonder.

«In'ovra idraulica cun rempars da serra è fitg simpla da realisar qua. L'aua cula simplamain en il Burgsee senza da duvrar energia per pumpas», di Frédéric Boden da la Groupe E ad SRF.

L'interpresa quinta cun custs da construcziun da 500 milliuns francs. Il lai da fermada duai in di producir dapli che 160 uras gigawat electricitad durant l'enviern. Quai correspunda circa al consum da l'entira Svizra per in di.

La vischnanca da Fieschertal sustegna il project. Il lai da fermada fiss tant protecziun cunter auas grondas sco er reservuar d'aua, di il president communal Peter Bähler. «Uss cula l'aua simplamain davent ed è uschia dal tuttafatg senza niz.»

Ussa cula l'aua simplamain davent ed è uschia dal tuttafatg senza niz.

Il dossier «Mir da fermada da Fiesch» n'è betg nov, el era gia sin maisa da l'anteriura cussegliera federala Simonetta Sommaruga. Igl è stà in da totalmain 32 projects ch'èn vegnids discutads da chantuns, da la branscha d'energia e da federaziuns per la protecziun da l'ambient.

Il rempar dal glatscher da Fiesch n'è dentant betg vegnì tranter ils 15 projects che la Confederaziun tracta cun prioritad.

In motiv è l'opposiziun previsibla cunter il project: Organisaziuns d'ambient crititgeschan fermamain ils plans.

Associaziuns d'ambient cunter lai da fermada en il Goms

«In rempar è ina intervenziun immensa en la natira. Là datti ina cuntrada da glatschers da gronda valur che vegniss inundada dal tuttafatg cun construir il mir da fermada», di Christopher Bonzi, expert d'aua dal WWF.

In rempar è ina intervenziun immensa en la natira.

Er la Fundaziun per la protecziun da la cuntrada refusa il project: A ses avis pudess il territori Jungfrau-Aletsch perder ses status sco ierta culturala mundiala da l’Unesco pervia dal mir da fermada.

Las autoritads vallesanas n'han anc betg scrit giu il rempar. Il project duai vegnir francà en ina segunda runda en il plan da structura chantunal, scriva il chantun sin dumonda da SRF.

Er Frédéric Boden dal concern d'energia Groupe E spera ch'il project na svaneschia betg en in truclet. «Quest rempar avess dad esser qua en 20 onns», di el. La Groupe E ponderescha actualmain d'instradar in studi da realisabladad. Cun quai èsi cler: Igl è anc ina lunga via, fin ad in rempar sur Fiesch.

Midada energetica grazia al vent?

Vegn la cuntrada svizra prest ad esser surtratga cun rodas da vent?

La Svizra duvrass var 760 rodas da vent per cuntanscher la finamira d'energia da la regenza per l'onn 2050. I giess era cun pli paucas rodas, ha mussà in studi – dentant mo, sch'ellas pudessan vegnir construidas sin terren agricul custaivel.

I dat stedi dapli funtaunas d'energia regenerabla. Il 2022 èn vegnids producids 22% da l'electricitad da la UE cun forza da vent e forza solara. Lez han uschia surpassà per l'emprima giada l'energia fossila (20%). La forza da vent è responsabla per radund 17% da la producziun delectricitad.

Era l'energia da vent en Svizra ha cuntanschì in nov record il 2022 e producescha tenor la federaziun Suisse Eole 5% dapli electricitad che l'onn avant. Ma il pajais ha anc ina lunga via per cuntanscher sias finamiras.

Cun data avrigl 2023 èn stadas en funcziun en Svizra 41 turbinas da vent che produceschan var 0.15 uras da terawatt (TWh) per onn – quai correspunda a 0.3 pertschient dal consum d'electricitad. La strategia d'energia 2050 da la Svizra vul augmentar la producziun sin 4.3 TWh ad onn per producir radund 7% da l'electricitad. Co po quai vegnir cuntanschì?

300 implants d'energia da vent en las Alps

In studi da l'ETH da Turitg vegn a la conclusiun che la Svizra dovra 760 implants d'energia da vent per cuntanscher sia finamira dal 2050. Quai fiss bunamain 20 giadas il dumber d'implants actual.

En il studi è er vegnì eruì, tge territoris geografics che fissan il meglier adattads. Radund 300 rodas stuessan vegnir erigidas en las muntognas dals chantuns Vallais e Grischun. 260 en la Bassa ed il rest en las Prealps.

Ils perscrutaders da la ETH han fatg lur analisa sa basond sin il stadi actual da la legislaziun che scumonda da construir implants d'energia da vent en guauds u en territoris agriculs. Els han er resguardà il fatg ch'en la Bassa pon las rodas da vent esser pli autas e pli productivas ch'en regiuns pli autas.

Indrizs d'energia da vent sin terren agricul

Pli paucas rodas da vent pudessan bastar, ma las prescripziuns per l'utilisaziun dal terren stuessan vegnir schluccadas, uschia il studi.

Sch'ils territoris agriculs en la Bassa cun spezialmain bler vent pudessan vegnir nizzegiads, duvrass la Svizra mo var 460 rodas da vent, han chattà ils perscrutaders. Questa terra è circa 40% da la surfatscha dal pajais che vegn utilisada da l'agricultura.

Cun trair a niz quest terren d'auta qualitad «avessan nus da construir bler pli paucs implants da forza da vent en territoris alpins», ha ditg Adrienne Grêt-Regamex, professuressa per planisaziun da cuntrada ed ambient a la ETH a Turitg e cunautura dal studi, en ina communicaziun da pressa.

Ils custs per construir per forza da vent sajan tendenzialmain pli auts en las muntognas ch'en las planiras, ha ella agiuntà. Ultra da quai sa sent la populaziun svizra spezialmain disturbada da rodas da vent en cuntradas alpinas intactas.

Il sectur agricul svizzer è avert per l'idea da producir energia da vent sin surfatschas ch'en consideradas sco indispensablas per la segirezza alimentara.

«Il squitsch sin quests champs decisivs è gia fitg grond. Cunquai che l'energia da vent è ina part impurtanta dal mix d'electricitad e perquai ch'ils implants d'energia da vent dovran mo ina pitschna surfatscha, pudessan tscherts projects esser raschunaivels.» ha Hannah von Ballmoos-Hofer, la manadra dals secturs energia ed ambient tar l'uniun purila svizra, scrit en in e-mail a SWI swissinfo.ch.

Tenor Ballmoos-Hofer è puraria pronta da gidar a producir energia. Sch'i vegnissan dentant construids implants electrics da vent sin terren agricul, stuessan ils purs survegnir ina «indemnisaziun adequata».

La scienziada per l'ambient Grêt-Regamex ha purtà il dilemma sin il punct. Sche la populaziun svizra vul uschè paucas rodas da vent sco pussaivel – tant en en las Alps sco dapertut, ston vegnir construids implants gronds e vesaivels là, nua ch'il vent è il pli ferm. «Sche nus dain la percunter la preferenza a la protecziun da territoris agriculs, na resta a nus nagut auter che d'expandar en las Alps.»

Offensiva da la forza da vent en il parlament

L'energia da vent na vul betg propi sa metter ad ir en Svizra. Il pajais n'ha betg las grondas surfatschas planivas e nunabitadas sco per exempel la Germania. Ultra da quai è dispitaivla la construcziun d'implants electrics da vent en las Alps. Las uniuns per la protecziun da l'ambient e da la cuntrada refusan projects en regiuns muntagnardas intactas. Da quest avis è era ina gronda part da la populaziun svizra, sco quai ch’ina retschertga da l'institut federal per la perscrutaziun da guaud, naiv e cuntrada WSL da l’october 2022 mussa. 

Tuttina vul la politica svizra dar in stausch decisiv a l'energia da vent - cunzunt suenter ils quitads davart il provediment d'electricitad da l'onn passà. Il mars ha il parlament decidì d'accelerar la construcziun da parcs da vent e da restrenscher il medem mument la pussaivladad da recurs. Uschia duai esser pussaivel da construir svelt var 150 rodas da vent per augmentar la producziun indigena d'electricitad durant l'enviern, cura ch'il pajais è dependent d'imports.

Project da geotermia è sut tetg

Project da geotermia – ferma resistenza a Delémont

Milli persunas demonstreschan en la chapitala dal Giura: «In privel per la populaziun e l'ambient»

In vaschè vegn purtà tras las vias da Delémont. Sin el l'inscripziun «Democrazia snegada». Tranter las radund milli demonstrantas e demonstrants che protesteschan en la chapitala dal chantun Giura cunter il project da geotermia en la vischnanca vischina Haute-Sorne hai era persunas vestgidas en nair.

Las tensiuns en connex cun quest tema creschan dapi mais. L'entschatta da settember ha l'uniun «Citoyens responsables Jura» (CRJ) intimà la regenza ed il parlament da smetter cun il project che saja in «privel per la populaziun e l'ambient». Las adversarias ed ils adversaris crititgeschan era che la populaziun na saja mai vegnida consultada. Uschia han era tunà ils slogans ch'èn vegnids scandads durant il cortegi.

Il project dispitaivel ha la finamira da gudagnar energia cun la stimulaziun idraulica a maun d'in stgamiader termic en ina profunditad da 4000 fin 5000 meters. L'implant duai proveder var 6000 chasadas cun electricitad. Fin uss è vegnida approvada mo la fasa da sondagi, a la quala vegn a suandar ina nova decisiun chantunala.

En la regiun èn ins particularmain sensibel quai che reguarda sondagis sutterrans. Bleras persunas sa regordan anc da la sistida dal project «Deep Heat Mining» l'onn 2006 a Basilea. En la citad vischina avevan las lavurs da sondagi chaschunà terratrembels d'ina fermezza da 2,5 fin 3,5 sin la scala da Richter.

Notiziario da las 17:00 dals 02-09-2023 

Procedura pli svelta

Proceduras pli sveltas per las energias regenerablas

Il Cussegl federal vul reducir ils termins per permissiuns e protestas cunter novs implants

https://pilot-prod-videos.s3.eu-west-1.amazonaws.com/rm/heavy-copper-jackal_it_DEEPGRAM-WHISPER.vtt

Dal cumenzament da la planisaziun d'in implant da vent, d'in implant solar u d'ina ovra idraulica a la realisaziun pon passar fin 20 onns. Memia blers. Da quella opiniun è il Cussegl federal che ha decidì da scursanir las proceduras. La finamira è d'augmentar svelt la producziun d'electricitad che deriva da funtaunas d'energia regenerablas.

La missiva per mauns dal parlament s'accorda cun l'acceleraziun ch'il parlament ha gia decretà per utilisar l'energia da vent. Per implants da vent ed implants solars d'impurtanza naziunala vegnan ils chantuns e betg las vischnancas a relaschar tut las permissiuns da construcziun, d'engrondiment e da renovaziun. La procedura na vegn damai betg pli dividida en pliras etappas, las qualas èn mintgina contestabla tras meds legals. Per questa fasa han ins previs ins in termin maximal da 180 dis.

Plinavant han ils chantuns l'incumbensa da fixar en lur plans directivs ils territoris adattads per tals implants, e quai resguardond la protecziun da la cuntrada. Er il process da planisaziun per l'amplificaziun da la rait electrica vegn scursanì.

La finala vegnan er scursanidas las proceduras da recurs. Sin plaun chantunal resta mo pli ina suletta, la dretgira da l'ultima instanza che ha 180 dis temp da s'exprimer. Far recurs pon mo pli instituziuns publicas interessadas ed organisaziuns per la protecziun da l'ambient sco il WWF, la Pro Natura e la Fundaziun svizra per la protecziun e la tgira da la cuntrada. Las instituziuns localas èn exclusas.

https://pilot-prod-videos.s3.eu-west-1.amazonaws.com/rm/operational-indigo-manatee_it_DEEPGRAM-WHISPER.vtt

Notiziario da las 22:00 dals 18-06-23: Implants solars sin edifizis novs 

Problems giuridics per fotovoltaica

Fotovoltaica avant dretgira: Exempel grischun

Cunter il project «ScuolSolar» è vegnì fatg recurs tar la Dretgira administrativa dal Grischun. Quai rapporta l'agentura da novitads «Fundaziun Medias Rumantschas FMR». Concret crititgeschian ils recurrents l’andament da communicaziun en connex cun l’implant fotovoltaic en il territori da skis Motta Naluns a Scuol en Engiadina bassa. Els avessan giavischà da pudair far ponderaziuns e da betg stuair decider nunspetgadamain tar la radunanza communala dals 21 d'avust. 

Sco che Jürg Arquint, in dals recurrents, ha declerà envers la FMR, crititgeschian els l'entir project. Tenor els na fetschia basegn da destruir la natira sin uschè ina gronda surfatscha. Era l’indemnisaziun per la vischnanca da Scuol na saja betg buna cun 0,75 raps per kWh. La vischnanca da Scuol sto ussa prender posiziun fin ils 20 da settember, fin la na vul ella betg communitgar a las medias. 

Ils 14 da settember sto la vischnanca burgaisa decider sch'ella vul metter a disposiziun il terren per il project. Malgrà quest recurs haja era la votaziun a l’urna ils 24 da settember lieu, ha confermà la vischnanca da Scuol envers la FMR. Quella decida definitivamain davart Il project che duai custar radund 100 milliuns francs e producir forza electrica per radund 20'000 chasadas. 

Sche la dretgira administrativa dess raschun als recurrents, pudess la votaziun dentant esser nunvalaivla, uschia Jürg Arquint.

La radunanza communala da Scuol sustegna l'implant solar

La radunanza communala da Scuol ha predeliberà la dumonda davart la realisaziun da l'implant «ScuolSolar» per mauns da la votaziun a l'urna. L'implant fotovoltaic duai vegnir realisà sin il territori sur la vischnanca en vischinanza da la regiun da skis Motta Naluns.

Ad ina saira d'orientaziun è la populaziun vegnida infurmada

Sin il terren da la vischnanca da Scuol en vischinanza dal territori da skis Motta Naluns èsi previs da realisar il project «ScuolSolar». Quest implant duess servir oravant tut a la producziun d’electricitad d’enviern. Tar il project preschentà sa tracti d'ina varianta maximala che prevesa da montar radund 92'000 panels cun ina surfatscha da 160'000 meters quadrats.

L'implant duai producir forza per radund 20'000 chasadas. La mitad d'avust ha lieu ina radunanza communala ch'orientescha sur dal project ed in settember vegn quel suttamess a la votaziun a l'urna. La dumonda da fabrica per il project fotovoltaic duess vegnir inoltrada anc l'october da quest on. L'emprima etappa dal project è prevesida da realisar la stad 2025. 

La vischnanca da Scuol, l'EE-Energia Engiadina e las Ovras Electricas d’Engiadina SA han elavurà ensemen il project. Previs èsi da fundar ina firma cun il num ScuolSolar SA, ina firma che vegn manada sco interpresa electrica fotovoltaica. La vischnanca ensemen cun las duas firmas sa duessan participar mintgina cun in terz.

In dals pli gronds implants solars en Svizra

Il project previs ha ina dimensiun da circa 77 hectaras e pudess producir electricitad per radund 20'000 chasadas, quai tenor las indicaziun che Scuol Solar fa. L'atun cura ch'ins aveva preschentà l'emprima giada il project vegniva anc discurrì d'ina dimensiun maximala da 35 hectaras. La varianta preschentada vegn a custar radund 100 milliuns francs. Il project «ScuolSolar» duess profitar da l’occasiun che resulta en il rom legal da l' express solar  lantschà il 2022, inizià da la Confederaziun.

Construida duai l'ovra vegnida sin la spunda dal Piz Champatsch en vischinanza da las pendicularas Motta Naluns. 

Anc auters vulan siglir sin l'express solar

En Grischun datti en divers lieus plans per ovras solaras. Tscherts projects èn gia pli concrets, auters èn visiuns. 

La radunanza da burgais aveva ditg  il november unanimamain Gea  a la construcziun dal parc solar sur Scuol.

Voss feedback!

Il 2050 duai la Svizra daventar neutrala al clima. La midada energetica dovra però bler dapli electricitad. Plans per ovras electricas fruntan sin resistenza.